صحت دے شعبے اچ عالمی عدم مساوات اہم مسئلہ اے، ترقی یافتہ اتے ترقی پذیر ملکاں وچال فرق مُکاوݨ دی لوڑھ اے، وزیراعظم شہباز شریف

ریاض۔28اپریل (اے پی پی) وزیر اعظم محمد شہباز شریف صحت دے شعبے اچ عالمی عدم مساوات کوں پہلا اتے ساریاں توں اہم مسئلہ آکھدیں ہوئیں صحت دے میدان اچ بین الاقوامی سطح تے ترقی یافتہ اتے ترقی پذیر تے ڳھٹ ترقی آلے ملکاں وچال ودھدی ہوئی خلیج کوں مکاوݨ دی ٻہوں لوڑھ دے۔ پاکستان ماحولیاتی تبدیلی توں متاثرہ ملکاں اچ ساریاں توں اُتے اے۔ حکومت ملک توں پولیو دے خاتمے کیتے پرعزم اے۔ او آݙت وار کوں عالمی اقتصادی فورم دے خصوصی اجلاس دے موقع تے صحت دے شعبہ اچ تفریق دے کاتمے دے موضوع تے مباحثہ توں خطاب کریندے پئے ہن۔ مباحثہ توں عالمی ادارہ صحت دے ڈائریکٹر جنرل ٹیڈروس ایڈہینم گبرائسس، کنگ سلمان ہیومنٹیرین ایڈ اینڈ ریلیف سینٹر دے سپروائزر جنرل ڈاکٹر عبداللہ الربیعہ اتےبل اینڈ میلنڈا گیٹس فاؤنڈیشن دی نمائندہ انیتا زیدی وی خطاب کیتا۔وزیراعظم محمد شہباز شریف آپݨے خطاب اچ آکھیا جو دنیا اچ صحت دے شعبے اچ عالمی عدم مساوات ٻہوں وݙا مسئلہ اے۔ انہاں آکھیا جو 2022 اچ ماحولیاتی تبدیلیاں پاروں پاکستان اچ شدید ترین چھل آیا جئیں زراعت، انفراسٹرکچر کوں تباہ کیتا، 100 ارب روپے توں ودھ بحالی تے خرچ تھیے، اوں ویلھے ٻاہرلی امداد دی لوڑھ ہئی جڈانجو مہانگے قرضے ملیے۔ کیا ترقی پذیر ملک ایجھی صورتحال نال نبڑݨ دی اہلیت رکھیندن؟وزیراعظم آکھیا جو 2011 اچ پنجاب اچ ڈینگی دا مرض آیا تاں پوری دنیا توں ماہرین کٹھے کر تے ݙینھ رات ہک کر تے اوں توں جان چھڑائی۔ انہاں آکھیا جو کنگ سلمان فاؤنڈیشن صحت دے شعبے اچ نشابر خدمات سرانجام ݙیندی پئی اے۔

مضمون کا ماخذ : اضافی مرچ

متعلقہ مضامین