ڈاکٹر ثانیہ نشتر دا نیویارک اچ اقوام متحدہ دے پولیٹیکل فورم پائیدار ترقی توں خطاب

اسلام آباد۔7جولائی (اے پی پی):سینیٹر ڈاکٹر ثانیہ نشتر، وزیراعظم دی معاون خصوصی سماجی تحفظ و تخفیف غربت نیویارک اچ اقوام متحدہ دےاعلیٰ سطحی پولیٹیکل فورم پائیدار ترقی توں خطاب کیتے ۔ٹاؤن ہال طرز تے منعقدہ پولیٹیکل فورم اچ 43 ملک شرکت کریندے پئن ۔فورم اقوام متحدہ دی معاشی و سماجی کونسل دے زیراہتمام پاکستان دی زیر صدارت منعقد تھیا۔ اقوام متحدہ اچ پاکستان دے سفیر منیر اکرم اجلاس دا آغاز کیتا۔ اپݨے خطاب اچ ڈاکٹر ثانیہ کورونا وبا دے تناظر اچ حکومت پاکستان دا کردار اتے لائحۂ عمل پیش کیتے۔ انہاں آکھیے جو کورونا وبا دے تناظر اچ احساس ایمرجنسی کیش دی ونڈ مکمل طور تے ڈیجیٹل نظام تے مشتمل ہئی اتے سماجی تحفظ اتے انسانی وسائل دی ترقی کورونا توں پہلے وی حکومت پاکستان دی ترجیحات اچ شامل ہن۔سماجی تحفظ دے اعتبار توں حکومت پاکستان دے اقدامات اتے انہاں دے اثرات تے روشنی پیندے ہوئیں ڈاکٹر ثانیہ آکھیے جو مستفید تھیوݨ آلی آبادی دے تناسب نال احساس ایمرجنسی کیش دنیا دا تریجھا وݙا پروگرام قرار ݙتا ڳئے ۔پاکستان دی نمائندگی کریندے ہوئیں ڈاکٹر ثانیہ مزید آکھیے جو سماجی تحفط دے ایں ملک گیر ہنگامی پروگرام دے توسط توں اساں ترائے اہم اسباق سکھئن ۔پہلا سماجی تحفظ دے پروگراماں کوں شفاف بݨاوݨ کیتے حقائق تے مبنی ڈیٹا اتے ترسیل دا جدید نظام، ݙوجھا، مالیاتی اتے ڈیجیٹل آگاہی دے ذریعے سماجی تحفظ اچ مالیاتی اتے ڈیجیٹل شمولیت کوں یقینی بݨاوݨ ۔تریجھا ، وبا دے تناظر اچ انسانی وسائل دا بھرپور تحفظ تاں جو ہنگامی صورتحال اچ منفی رجحانات دا سدباب تھیوے ۔ بعد اچ ڈاکٹر ثانیہ نیویارک اچ اقوام متحدہ دے عالمی مراسلہ نگاراں اتے نامہ نگاراں کوں کورونا وبا دے پس منظر اچ احساس تے تفصیلی بریفنگ وی ݙتی ۔

مضمون کا ماخذ : پاور بال لاٹری

متعلقہ مضامین