وفاقی آئینی عدالت دا قیام قائداعظم دا خواب ہئی ، بلاول بھٹو زرداری

Pakistani Foreign Minister Bilawal Bhutto Zardari | AP

اسلام آباد۔12اکتوبر(اے پی پی) پاکستان پیپلز پارٹی دے چیئرمین بلاول بھٹو زرداری آکھیے وفاقی آئینی عدالت دا قیام قائداعظم دا خواب ہئی ۔ پاکستان پیپلزپارٹی دے چیئرمین بلاول بھٹو زرداری ایکس تے آپݨے سنھیے اچ آکھیے جو قائداعظم ساریں توں پہلے وفاقی آئینی عدالت دی تجویز پیش کیتی۔چیئرمین بلاول بھٹو زرداری حوالے ݙیندے آکھیے قائد اعظم محمد علی جناح پہلی واری وفاقی آئینی عدالت دی تفصیل 27 اکتوبر 1931 کوں لندن اچ منعقدہ گول میز کانفرنس اچ پیش کیتی ،قائداعظم دی اے تجویز تقریباً پی پی پی دی پیش کیتی ڳئی تجویز نال مماثلت رکھیندی اے ، قائداعظم شہریاں دے بنیادی حقوق دے نفاذ سانڳے وفاقی آئینی عدالت، ہائی کورٹس دے فیصلیں دے خلاف اپیل سانڳے سپریم کورٹ تے ھک فوجداری اپیل دی عدالت دی تجاویزݙتیاں ،قائداعظم دا موقف ہئی جو کوئی وی سوال جیڑھا وفاقی آئین متعلق ہووے یا آئین توں پیدا تھیوے، اینکوں وفاقی آئینی عدالت اچ ونڄݨا چاہیدے ،قائداعظم ھک ہی عدالت کوں’’وفاقی قوانین‘‘تے وسیع دائرہ اختیارݙیوݨ دی وی مخالفت کیتی۔چیئرمین بلاول بھٹو زرداری آکھیے قائداعظم دا موقف ہئی جو میں موقف رکھینداں جو کہیں وی شہری کوں ، جے ایندے حق تے حملہ کیتا ونڄے یا اینکوں چیلنج کیتا ونڄے ، ظاہر اے جو اے آئین متعلق ہووݨا چاہیدے ، شہری دے حقوق تے حملے دا معاملہ براہ راست وفاقی عدالت اچ ونڄݨ دا حق حاصل ہووݨا چاہیدے ،قائداعظم آکھیے ایں طرح دی حد بندی نال وفاقی عدالت اتنی زیادہ مصروف نہ ہوسی جو ایں سانڳے مقدمیں کوں وختی نبیڑیا ونڄ سڳے ، قائداعظم موجب ایں عدالتی نظام دا ھک ٻیا فیدہ اے تھیسی جو انڄ وفاقی عدالت دی تقرری دے دوران ایجھے لوکاں کوں چݨیا ونڄے جیڑھے آئینی معاملات اچ خاص مہارت رکھیندے ہوون تاں تساں ایجھا نظام بݨیسوں جیڑھا ساریں توں زیادہ قابل ترجیح ہوسی ، قائد اعظم گول میز کانفرنس اچ آکھیے اساں ڄاݨدوں جو اے ماہرین دا دور اے اتے ہندوستان اچ اساں ایں سطح تے نی پڄے ۔ چیئرمین بلاول بھٹو زرداری آکھیے سویلے دے ٹائم تساں ہندو قانون دے ھک اوکھے سوال تے دلائل ݙیندے پئے ہوندو تے ݙوپہریں اچ تساں روشنی اتے ہوا تے آسانی دے معاملات تے بحث کریندے پئے ہوندو ، قائداعظم گول میز کانفرنس اچ آئینی عدالت دے حق اچ دلائل اچ آکھیے اڳلے ݙینھ تساں ھک تجارتی مقدمے کوں ݙیکھدے پئے ہوندو تریجھے ݙینھ تساں شاید ھک طلاق دے مقدمے نال نبڑدے پئے ہوندو تے چوتھے ݙینھ تساں ھک ایڈمرلٹی مقدمے دی سماعت کریندے پئے ہوندو ۔بلاول بھٹو آکھیے اے قائداعظم دی طرفوں عدالتاں تے غیر ضروری ٻوجھ کوں گھٹ کرݨ دا حل ہئی جیڑھا انھاں کوں ݙتے ڳئے وسیع دائرہ اختیار پاروں ہئی،قائداعظم دی تجاویز بعد اچ جرمنی دے 1949 دے بنیادی قانون نال وی مماثلت رکھیندیاں ہن جیں وفاقی آئینی عدالت بݨائی۔

مضمون کا ماخذ : آن لائن لاٹری پاکستان

متعلقہ مضامین